I'l cuors da la seguonda decada es tant il numer da scolaras e scolars sco eir quel da magistras e magisters creschü. Pro'ls uffants e giuvenils, da 15 amo dal 2012/13 a 30 hoz, dimena pel dubel. Quai ha dumandà müdamaints. No vain introdüt ün s-chalin da classas implü e structurà eir las localitads ed ils prozess da lavur in oter möd. Dal sistem dual 1. - 4. cl e 5. - 8. cl - amo actual dal 2015/16 - eschan rivats hoz ad üna spartiziun da 1./2.cl. 3./4.cl. 5. - 7.cl. ed üna gruppa pitschna da scolars dad 8 avla classa. La scoula ha survgni in quist temp eir daplü scolaras e scolars d'utro, da la regiun Tavo / Partens fin in Engiadin'ota. Ella s'ha müdada uschè ad üna scoula da di cun maisa da mezdi. Quai es eir il motiv cha'l cumanzamaint da scoula es gnü spostà süllas 8.45 h. Il di da lavur düra fin a las 16.15 h cun üna posa da mezdi cuorta da be 75 min.
Id ha dat eir mumaints main allegraivels: Il bel üert suot la chasa da scoula es gnü surfabrichà in quists ons. Ed eir al üertin davo chasa - cha no vaivan lura miss ad ir sco plazzal da giovar cun chasina construida aint illa bos-cha - vaina gnü da desister davo pacs ons. Uschè chi'ns manca il spazi intuorn nossa scoula.
Grazia al interess per la pedagogia cha no ans sfadiain da realisar quia, vaina survgni collavuratur/as chi vegnan aint dal Vnuost. Els s'ingaschan intant sco magister/as da classa e piglian sün sai ün viadi da 2 uras al di per pussibiltar in nossa val quista sporta d'educaziun e fuormaziun "otra e basada unicamaing sül svilup da l'uffant".
Sper ils programs da turas da muntogna e turas da skis chi'd han gnü lö tuot ils ons, vaina pudü realisar divers progets artistics culs uffants, p.ex. il "Sommernachtstraum" da Sheakspeare sco gö liber cun tuot la scoula, d'incuort "Anatevka" sco gö da teater e chant ed ün grond proget da circus. No vain tut part a progets da chant illa baselgia da Scuol, vain realisà gös da chant insembel culla scoula da musica e'l Traideschin sco gö da Chasparets. E minch'on, avant Nadal, muossan noss/as scolars/as in üna o l'otra fuorma ün gö da Nadal.
Vieplü s'ha muossà i'ls ultims ons chi voul ün agen stabilimaint da scoula. Las ideas e'ls plans s'han concretisats düront l'on passà ad ün proget nouv al lö existent da la scoula. (link proget)
Uschè vezzaina cha la biografia d'üna cumünanza sociala ha parallelas culla biografia umana. Tanter 10 - 20 es il temp da la pubertà cun tuot ils müdamaints, tentativas e fluctuaziuns emoziunalas. A la fin da quista fasa resulta l'uman creschü ed autonom ill'età da 21 ons.
Sco grond regal pel cumanzamaint da la terza decada vaina pudü salüdar al principi da quist on da scoula (2020/21) 8 uffants illa prüma classa!